Youn kahani to sunani nahi ati mujh ko : poet zain shakeel

یوں کہانی تو سنانی نہیں آتی مجھ کو

کیا کروں بات گھمانی نہیں آتی مجھ کو

کر دیا کرتے ہیں آنسو مرے غم کو ظاہر

اک نشانی بھی چھپانی نہیں آتی مجھ کو

عشق کرتب تو نہیں ہے مِرے معصوم صِفَت

جھیل میں آگ لگانی نہیں آتی مجھ کو

تم بھی اب دن میں ملاقات کی زحمت کرنا

چاندنی رات چرانی نہیں آتی مجھ کو

اپنی جانب تجھے کس ڈھب سے کروں گا مائل

اک توجہ بھی دلانی نہیں آتی مجھ کو

وہ جو پہلے بھی بتاتے ہوئے دل ڈرتا تھا

اب بھی وہ بات بتانی نہیں آتی مجھ کو

دن نکلنے کو ہے سو جاؤ خدارا اب تو

کوئی پریوں کی کہانی نہیں آتی مجھ کو

زین شکیل

Youn kahani to sunani nahi ati mujh ko

Kya karon? Baat ghumani nahi ati mujh ko

Kar diya kartay hain aansu mere gham ko zaahir

Ik nishani bhi chupani nahi ati mujh ko

Ishq kartab to nahi hai mere masoom sifat

Jheel main aag lagani nahi ati mujh ko

Tum bhi ab din ma mulaqaat ki zehmat karna

Chaandni raat churaani nahi ati mujh ko

Apni janib tujhay kis dhab se karon ga mayel

Ik tawajja bhi dilani nahi ati mujh ko

WO jo pehle bhi batatay huye dil darta tha

Ab bhi wo baat batani nahi ati mujh ko

Din nikalne ko hai so jao khudara ab to

Koi pariyon ki kahani nahi ati mujh ko

Zain Shakeel

dar e sakha bhi abhi tak tera khula hi nahi : poet zain shakeel

درِ سخا بھی ابھی تک ترا کھلا ہی نہیں

ہمارے لب پہ تو یوں بھی کوئی دعا ہی نہیں

ہمیں تو ایک اسی کی طلب ہی جاتی نہیں

کہ جسکا ایک محبت پہ اکتفا ہی نہیں

ابھی یہ لوگ مگن ہیں حروف تولنے میں

ابھی تو شہر نے لہجہ مرا سنا ہی نہیں 

مجھے تو یوں بھی مری جان سے عزیز ہو تم

یہ بات الگ ہے کوئی تم سا دلبربا ہی نہیں

بس ایک چھوٹا سا آنگن ، تمہاری یاد اور میں

مرے مکاں میں اداسی کی انتہا ہی نہیں

بچھڑ کے مجھ سے وہ شاید بہت اداس رہے

کبھی میں پہلے اسے چھوڑ کر گیا ہی نہیں

وہ چاہتا ہے کہ بس اس کی دسترس میں رہوں

اسی کے لب پہ مرے نام کی صدا ہی نہیں

اُسے اب اپنے ہی ہاتھوں گنوا کے سوچتے ہیں

ہمارا اُس کے علاوہ تو کوئی تھا ہی نہیں

زین شکیل

dar e sakha bhi abhi tak tera khula hi nahi

hamaray lab pe to youn bhi koi dua hi nahi

hamain to aik usi ki talab hi jati nahi

k jiska aik muhabbat pe uktifa hi nahi

abi ye loag magan hain haroof tolne main

abhi to sheher ne lehja mera suna hi nahi

muje to youn bhi meri jaa se azeez ho tum

yeh baat alag hai koi tum sa dil ruba hi nahi

bas aik chora sa aangan, tumhari yaad aor main

mere makan main udaai ki intihaa hi nahi

bichar k muj se wo shayed bohot udaas rahay

kabhi main pehel usay chor kar gya hi nahi

wo chahta hai k bas us ki dastaras main rahon

usi k lab pe mere naam ki sadaa hi nahi

usay ab apne hi hathon ganwa k sochtay hain

hamara us k ilawa to koi thaa hi nahi

Zain Shakeel

tumhain ye zulm karna aagya hai : poet zain shakeel

تمہیں یہ ظلم کرنا آ گیا ہے؟

محبت سے مکرنا آ گیا ہے؟

وہی بس! ہاں وہی! کرتی تھی جو تم

مجھے وہ جادو کرنا آ گیا ہے

خدا جانے یہ کیسے ہو گیا پر

مجھے دل میں اترنا آ گیا ہے

بتاؤ آئینے توڑے ہیں کتنے

تمہیں جو یوں سنورنا آ گیا ہے

تمہاری آس میں جیتے ہوئے اب

ہمیں بھی روز مرنا آ گیا ہے

وہاں سے اب گزرنا پڑ رہا ہے

جہاں تم کو ٹھہرنا آ گیا ہے

مجھے بھی تیری یادوں کی گلی میں

خموشی سے بکھرنا آ گیا ہے

زین شکیل

tumhain ye zulm karna aagya hai?

muhabat se mukarna aagya hai?

wohi bas! han wohi! karti thi jo tum

muje wo jadu karna aagya hai

khuda janay ye kese hogya per

muje dil main utarna aagya hai

batao aainay torray hain kitne

tumhain jo youn sanwarna aagya hai

tumhari aas main jeetay huye ab

hamain bhi roz marna aagya hai

wahan se ab guzarna par raha hai

jahan tum ko theherna aagya ha

muje bhi teri yadon ki gali main

khamoshi se bikharna aagya hai

Zain Shakeel

us k andar theen wo subhani baten, subhan Allah : poet zain shakeel

اس کے اندر تھیں وہ سبحانی باتیں، سبحان اللہ!

سائیں کی کرتی تھی، دیوانی، باتیں ، سبحان اللہ!

جب دونوں اک ہیں تو پھر یہ میں اور تُو کا جھگڑا کیا؟

پی وحدت کی مئے کر مستانی باتیں، سبحان اللہ!

جو تیرا، تُو اس کا، پھر وہ جو بولے، وہ تُو بولے

ساری سَچی، سُچی، لافانی باتیں ، سبحان اللہ!

وہ کہتا ہے میں منصوری، میں تبریزی، میں رومی

اس کے لب اور ایسی وجدانی باتیں! سبحان اللہ!

سائیں کی بس ایک نظر سے روح تلک دھل جاتی ہے

آنکھوں سے کرتا ہے روحانی باتیں، سبحان اللہ!

سبحان اللہ، ان کے آگے پتھر بھی بول اٹھتے ہیں!

کر اٹھی حیرت کی حیرانی، باتیں! سبحان اللہ!

ہائے صدقے، سوہنا، مٹھڑا سانول کرتا رہتا ہے

کیسی میٹھی، پیاری، یزدانی باتیں، سبحان اللہ!

زین شکیل

us k andar theen wo subhani baten, subhan Allah

saien ki karti thi deevani baten, subhan Allah

jab dono ik hain to phir yeh main aor tuu ka jhagra kya?

pee wahdat ki may kar mastani baten subhan Allah

jo tera, tu uska, phir wo jo bolay, wo tu bolay

sari sachi suchi, lafani baten, subhan Allah

wo kehta hai main mansoori, main tabrezi, main roomi

us k lab aor aisi vajdaani baten, subhan Allah

saien ki bas aik nazar se rooh talak dhul jati hai

ankhon se karta hai roohani baten, subhan Allah

subhan Allah, un k agay pathar bhi bol uthtay hain!

kar uthi herat ki heraani baten, subhan ALLAh

haye sadqay, sohna, mithra sanwal karta rehta hai

kesi meethi, pyari, yazdani baten, subhan Allah

Zain Shakeel

mere peron main zanjeer piya : poet zain shakeel

مرے پیروں میں زنجیر پِیا

اب نین بہاویں نیر پِیا

اے شاہ مرے اک بار تو آ

تو وارث، میں جاگیر پِیا

تم سپنوں کی تعبیر پِیا

بے نام ہوئی، گم نام ہوئی

کیوں چاہت کا انجام ہوئی

مرا مان رہے، مجھے نام ملے

اک بار کرو تحریر پِیا

تم سپنوں کی تعبیر پِیا

کب زلف کے گنجل سلجھیں گے

کب نیناں تم سے الجھیں گے

کب تم ساون میں آؤ گے

کب بدلے گی تقدیر پِیا

تم سپنوں کی تعبیر پِیا

سب تیر جگر کے پار گئے

مجھے سیدے کھیڑے مار گئے

آ رانجھے آ کر تھام مجھے

تری گھائل ہو گئی ہیر پِیا

تم سپنوں کی تعبیر پِیا

میں جل جل ہجر میں راکھ ہوئی

میں کندن ہو کر خاک ہوئی

اب درشن دو، آزاد کرو

اب معاف کرو تقصیر پِیا

تم سپنوں کی تعبیر پیا

کب زین اداسی بولے گی

کب بھید تمہارا کھولے گی

کب دیپ بجھیں ان آنکھوں کے

تم مت کرنا تاخیر پِیا

تم سپنوں کی تعبیر پِیا

زین شکیل

dil o nigah main uski jo baal tha to kya hua : poet zain shakeel

دل و نگاہ میں جو اس کی بال تھا تو کیا ہوا
چلو اگر اسے کوئی ملال تھا تو کیا ہوا

سخی تو جانتا تھا اس سے مانگ کیا رہا ہوں میں

لبوں پہ کوئی اور ہی سوال تھا تو کیا ہوا

ہنسی خوشی تمہارا درد بھی گلے لگا لیا

جو عمر بھر کے واسطے وبال تھا تو کیا ہوا

ترے سوا کسی کی سمت دیکھنا نہیں مجھے

وہ کوئی دوسرا جو با کمال تھا تو کیا ہوا

چلو یہ زعم ہے ہمیں کہ بس اسی کے ہی رہے

اسے جو سارے شہر کا خیال تھا تو کیا ہوا

میں تھک کےہی گرا تھا ، ہار تو نہیں تھی مان لی

جو تھوڑی دیر کے لیے نڈھال تھا تو کیا ہوا

زین شکیل

dil o nigaah main jo us ki baal tha to kya hua

chalo agar usay koi malal tha to kya hua

sakhi to janta tha us se maang kya raha hon main

labon pe koi aor hi sawaal tha to kya hua

hansi khush tumhara dard bhi galay laga liya

jo umr bhar k vastay vabaal tha to kya hua

tere siva kisi ki samt dekhna nahi muje

wo koi doosra jo bakamaal tha to kya hua

chalo yeh zoam hai hamain k bas usi k hi rahay

usay jo saray sheher ka khyaal tha to kya hua

main thak k hi gira tha haar to nahi thi maan li

jo thori der k liye nidhaal tha to kya hua

Zain Shakeel

uski ankhon k samnadar main utarnay k siva : poet zain shakeel

اس کی آنکھوں کے سمندر میں اترنے کے سوا

کوئی چارہ بھی نہیں تھا ڈوب مرنے کے سوا

تم سمیٹو گے کہاں تک جائو اپنی راہ لو!

کچھ بھی تو آتا نہیں مجھ کو بکھرنے کے سوا

کیا مرے زخموں پہ مرہم بھی لگائو گے کہو؟

تم تو کرتے ہی نہیں کچھ بھی سنورنے کے سوا

ہم کہ بس قیدِ محبت میں پڑے ہیں آج بھی

سب کیا ہے مرحلہ یہ پار کرنے کے سوا

میری مرضی پوچھنے والے تمہیں معلوم ہے!

اور تم سے کیا کہوں گا میں ٹھہرنے کے سوا

اس کے سب جھوٹے دلائل ماند پڑنے لگ گئے

کچھ نہیں کر پائے گا اب وہ مکرنے کے سوا

زین شکیل

uski ankhon k samnadar main utarnay k siva

koi chaara bhi nahi tha doob marnay k siva

tum sameto gay kahan tak jao apni raah lo

kuch bhi to ata nahi mujh ko bikharnay k siva

kya mere zakhmon pe marham bhi lagao gay kaho?

tum to kartay hi nahi kuch bhi sanwarnay k siva

hum k bas qaid e muhabbat main paray hain aaj bhi

sab kiya hai marhala yeh paar karne k siva

meri marzi poochnay walay tumhain maloon hai!

aor tum se kya kahon ga main theherne k siva

us k sab jhootay dlaayel maand parne lag gaye

kuch nahi kar paye ga ab wo mukarne k siva

Zain Shakeel

kuch is tarah meri qismat sanwaar di gayi hai : poet zain shakeel

کچھ اس طرح مری قسمت سنوار دی گئی ہے

کہ دل میں آپ کی صورت اتار دی گئی ہے

کسی بھی شام سے اب واسطہ نہیں رکھنا

تمہارے وصل کی خواہش بھی مار دی گئی ہے

اگر یہ کوئی سنے گا تو کیا وہ سوچے گا؟

کہ ایک عمر کسی در پہ ہار دی گئی ہے!

میں دوستوں سے کہوں کیا کہ فکرِ دنیا بھی

کسی کی یاد کے صدقے میں وار دی گئی ہے

اب اس طرح سے اجڑ کر کہیں پڑے ہوئے ہیں

کہ جیسے ذات بھی جوئے میں ہار دی گئی ہے

زین شکیل

kuch is tarah meri qismat sanwaar di gayi hai

k dil main aap ki soorat utaar di gayi hai

kisi bhi shaam se ab waasta nahi rakhna

tumharay vasl ki khwakhish bhi maar di gayi hai

agar yeh koi sunay ga to kya wo sochay ga?

k aik umr kisi dar pe haar di gayi hai!

main doston se kahon kya k fikr e dunia bhi

kisi ki yaad k sadqay main waar di gayi hai

ab is tarah se ujjr kar kaheen paray huye hain

k jese zaat bhi juuye main haar di gayi hai

Zain Shakeel

mera saajan bichra mehraman : poet zain shakeel

مرا ساجن بچھڑا محرماں

مرے آنسو بیچ قطار

مری نیندیں بہہ گئیں آنکھ سے

مرے سپنے زار و زار

**********

مجھے غم کے تھل سب کھا گئے

مجھے چاٹے دکھ کی ریت

مری روح بھی ایسی بانجھ ہوئی

مرے من کے اجڑے کھیت

مرے دن کے سوگ عجیب سے

مری رات کے اپنے بین

میں رو رو برہا کاٹتی

مرے نین نہ پائیں چین

مری پوجا مل گئی خاک میں

مری عرضی نا منظور

پھر کیونکر جل جل راکھ ہوں

نہ موسیٰ نہ میں طور

مجھے ماریں پھول گلاب کے

مرے نیناں چبھ گئے خار

مرا ساجن بچھڑا محرماں

مرے آنسو بیچ قطار

**********

اک سچ کی رنگت اڑ گئی

جب بیٹھا بن بن جھوٹ

کیا پڑھنت پڑھا اس ہجر نے

ہر مشکل ہوئی اٹوٹ

اک سینے میں اک سانس تھی

اب سانس میں ہے ہلچل

کوئی آ کر درد کو بو گیا

مرے چل گیا سینے ہَل

اک درد ہوا کی اوٹ میں

مرے آ کر چومے گال

مرا خون وچھوڑا پی گیا

مری پھر بھی آنکھیں لال

مرا پریتم جھولی ڈال وے

ترے آن پڑی دربار

مرا ساجن بچھڑا محرماں

مرے آنسو بیچ قطار

**********

زین شکیل

dil apna ranjoor hua hai, hadd hai naa : poet zain shakeel

دل اپنا رنجور ہوا ہے، حد ہے ناں

تُو بھی ہم سے دور ہوا ہے، حد ہے ناں

تک تک راہیں ہار گئی ہے اک داسی

اک راجہ مہجور ہوا ہے، حد ہے ناں

اس نے چاہے جھوٹ ہی بولاہو مجھ سے

دل پھر بھی مغرور ہوا ہے، حد ہے ناں

مدت سے جو درد جگر میں مخفی تھا

مانگ کا اب سیندور ہوا ہے، حد ہے ناں

ہر جانب ہے صرف انا الحق کی آواز

ہر ذرہ منصور ہوا ہے، حد ہے ناں

دل بھٹکا تھا ایک تجلّی کی خاطر

اور اب جل کے طور ہوا ہے، حد ہے ناں

اب تو اپنی نیند بھی زخمی زخمی ہے

ہر سپنا معزور ہوا ہے، حد ہے ناں

زین شکیل

dil apna ranjoor hua hai, hadd hai naa

tu bhi hum se door hua hai, hadd hai naa

tak tak rahen haar gayi hai ik daasi

ik raaja mehjoor hua hai, hadd hai naa

us ne chahay jhoot hi bla ho muj se

dil phir bhi maghroor hua hai, hadd hai naa

muddat se jo dard jigar main makhfi tha

maang ka ab sindoor hua hai hadd hai naa

har janib hai sirf anal haq ki awaaz

har zarra mansoor hua hai, hadd hai naa

dil bhatka tha aik tajjali ki khatir

aor ab jal k toor hua hai, hadd hai naa

ab to apni neend bhi zakhmi zakhmi hai

har sapna mazoor hua hai, hadd hai naa

Zain Shakeel

aj phir hosh thikanay lagay hain : poet zain shakeel

آج پھر ہوش ٹھکانے لگے ہیں

آپ کو دل سے بھلانے لگے ہیں

ہم جسے سب کو بتاتے رہے تھے

آپ وہ بات چھپانے لگے ہیں

میں کہاں ہوں، مجھے لائو کہیں سے

وہ بڑی دور سے آنے لگے ہیں

اے غمِ دنیا ذرا ٹھہر تو جا

ہم انہیںرو کے منانے لگے ہیں

نیند تم ہی نہ چلی جانا کہیں

آج وہ خواب میں آنے لگے ہیں

وہ تو سج دھج کے بھی اجڑا ہی رہے

ہم بھی کس گھر کو سجانے لگے ہیں

تو نے پل بھر میں جو اک بات سنی

مجھ کو کہنے میں زمانے لگے ہیں

ایک تعبیر مٹانے کے لئے

خواب کو آگ لگانے لگے ہیں

دیکھ لو سانس نکلنے لگی ہے

ہم تمہیں چھوڑ کے جانے لگے ہیں

زین شکیل

aj phir hosh thikanay lagay hain

ap ko dil se bhulanay lagay hain

hum jisay sab ko batatay rahay thay

ap wo baat chupanay lagay hain

main kahan hon muje lao kaheen se

wo bari door se anay lagay hain

ae gham e dunia zara tehher to ja

hum unhain ro k mananay lagay hain

neend tum hi na chali jana kaheen

aaj wo khwab main anay lagay hain

wo to saj dhaj k bhi ujra hi rahay

hum bhi kis ghar ko sajanay lagay hain

tu ne pal bhar main jo ik baat suni

muj ko kehne main zamanay lagay hain

aik tabeer mitanay k liye

khwaab ko aag laganay lagay hain

delkh lo saans nikalnay lagi hai

hum tumhain chor k janay lagay hain

Zain Shakeel

sun sanson k sultan piya : poet zain shakeel

سُن سانسوں کے سلطان پیا

ترے ہاتھ میں میری جان پیا

میں تیرے بن ویران پیا

تو میرا کُل جہان پیا

مری ہستی، مان، سمان بھی تو

مرا زھد، ذکر، وجدان بھی تو

مرا، کعبہ، تھل، مکران بھی تو

میرے سپنوں کا سلطان بھی تو

کبھی تیر ہوئی، تلوار ہوئی

ترے ہجر میں آ بیمار ہوئی

کب میں تیری سردار ہوئی

میں ضبط کی چیخ پکار ہوئی

مرا لوں لوں تجھے بلائے وے

مری جان وچھوڑا کھائے وے

ترا ہجر بڑا بے درد سجن

مری جان پہ بن بن آئے وے

مری ساری سکھیاں روٹھ گئیں

مری رو رو اکھیاں پھوٹ گئیں

تجھے ڈھونڈ تھکی نگری نگری

اب ساری آسیں ٹوٹ گئیں

کبھی میری عرضی مان پیا

میں چپ، گم صم، سنسان پیا

میں ازلوں سے نادان پیا

تو میرا کُل جہاں پیا

زین شکیل

zamany bhar ko na dukh sunatay, muje batatay : poet zain shakeel

زمانے بھر کو نہ دکھ سناتے، مجھے بتاتے!

قریب ایسے نہ رنج آتے، مجھے بتاتے!

ترس رہی تھی تمہاری آواز کو سماعت

سو جھوٹی باتیں ہی تم بناتے، مجھے بتاتے!

بہت کہا تھا تمہیں زمانہ نہیں سہے گا

سو یوں نہ ہوتا جو پاس آتے، مجھے بتاتے!

کوئی جو روٹھا تو رو پڑے ناں، تمہیں کہاتھا

مجھے رلاتے، مجھے ستاتے، مجھے بتاتے!

بڑی محبت سے پیش آتا، تمہیں ہنساتا

پھر ایک چاہت کا گھر بناتے، مجھے بتاتے!

ہے میرے دل میں بھی بےقراری، قسم تمہاری

یونہی اکیلے نہ خوں جلاتے ، مجھے بتاتے!

تمہاری خاطر میں لوٹ آتا، تمہاری سنتا

بس اک دفعہ تم مجھے بلاتے، مجھے بتاتے

زین شکیل

zamany bhar ko na dukh sunatay, muje batatay!

qareeb aisay na runj atay, muje batatay!

taras rahi thi tumhari awaz ko samaat 

so jhooti baten hi tum banatay, muje batatay!

bohot kaha tha tumhain zmaana nahi sahay ga

so youn na hota jo paas atay, muje batatay!

koi jo rootha to ro parray naa, tumhain kaha tha

muje rulatay, muje satataty, muje batatay!

bari muhababt se pesh ata, tumhain hansata

phir aik chahat ka ghar banatay, muje batatay!

hai mere dil main bhi beqarari, qasam tumhari

youhi akele na khoon jalatay, muje batatay!

tumhari khatir main loat ata, tumhati sunta

bas ik dafa tum muje bulatay, muje batataty!

Zain Shakeel