پنجابی کلام

*******************

زین شکیل کا پنجابی کلام

*******************

ساڈی اکھیں اتھرو ،لال 

ساڈے سینے دکھ دے ،جال 

اسیں لبھدے پھرئیے سُکھ

سانوں تھاں تھاں لبھے دُکھ 

ساڈے سفنے وی کنگال 

ساڈی اکھیں اتھرو، لال 

سانوں نیندر دا نئیں وَل 

اسیں لیندے اکھیاں مَل 

ساڈے سپنے کرَن سوال 

ساڈی اکھیں اتھرو، لال 

تری خاطر چھڈیا دیس 

اسیں لکھ وٹائے بھیس 

اسیں اَج حالوں بے حال 

ساڈی اکھیں اتھرو، لال 

اسیں رولی اپنی جاں 

نئیں لبھدی رون دی تھاں 

ساڈے ہنجو پانڑں دھمال 

ساڈی اکھیں اتھرو، لال 

ساڈا سِینا وانگ تندور

ساڈا سانول اکھ توں دور 

چلے مُک جندڑی دے سال

ساڈی اکھیں اتھرو، لال 

میں عرض کراں رو رو

ہُن جتن کراں سو سو

کدی مُڑ آ وے لجپال

ساڈی اکھیں اتھرو، لال

توں آس امید دا سِک 

میری تھر تھر کمبے ہِک 

میرے دل دے وچ پُچال 

ساڈی اکھیں اتھرو، لال 

ساڈے گل وچ ہجر دا پھاہ

ساڈا رک رک آوے ساہ 

ساڈا رووے اک اک وال 

ساڈی اکھیں اتھرو، لال 

ساڈی اکھیں پے گئی پُکھ ،

ساڈے دل دا سُکیا رُکھ،

اِک سُکھ دا رہ گیا کال

ساڈیں اکھیں اتھرو، لال 

ہُن زین رضا نوں مَن،

بھاویں سڑ جاوے تن من،

کدی آ پُچھسی او حال 

ساڈی اکھیں اتھرو، لال

ساڈے سینے دکھ دے ،جال

زین شکیل

*************

ساڈا رانجھن بے پرواہ

ساڈا درداں دے ہتھ دل

ساڈی اکھیاں وچ صحرا

ساڈے سینے چلدی لُو

ساڈی زخمی ہو گئی روح

ساڈے ساہواں اندر کَکھ

ساڈی ٹوٹے ٹوٹے دَکھ

سانوں ڈنگھے اک اک پل

سانوں دکھڑے لیندے مَل

ساڈا کملا  ٹُٹیا  دل

ساڈی اکھیاں وچ برسات

ہُن کیہ اپنی پرواہ

اُوس چھڈیا مغروں لاہ

ساڈا رانجھن بے پرواہ

ساڈاڈھولن بے پرواہ

زین شکیل

*************

تانگ ملن دی مار گئی اے مائے نی

جندڑی رو رو ہار گئی اے مائے نی

اکھیاں بدلاں وانگوں وسن ہر ویلے

دھپ یاداں دی ساڑ گئی اے مائے نی

رُت وچھوڑے والی میری جندڑی نوں

دکھ سولی تے چاڑھ گئی اے مائے نی

یار دی بیڑی میرے ہنجواں وچ تردی

لنگھ اکھیاں توں پار گئی اے مائے نی

سکھ دی بدلی میرے ویڑھے وچ آ کے

روندی زار قطار گئی اے مائے نی

چپ چپیتے دکھاں نال بھری برچھی

کھب سینے وچکار گئی اے مائے نی

زین دناں دے شکوے کرئیے نال کدھے

سانوں شام اجاڑ گئی اے مائے نی

زین شکیل

*************

آسرا

دلے دی سوڑ 

مُکاون دے لئی

لوڑاں ہسدے مُکھ

زین شکیل

*************

تارے ویکھن بیہہ جاندی اے جھلی جہی 

کلّم کلّی رہ جاندی اے جھلی جہی

توں محرم تے توں ای غیر، پرایا ایں

کیہ کج مینوں کہہ جاندی اے جھلی جہی

اُس دا مکھڑا درداں رج سجایا اے

دکھڑے سارے سہہ جاندی اے جھلی جہی

جیڑھی گل میں سُنن میں جاواں اوہ چھڈ کے

ساریاں گلّاں کہہ جاندی اے جھلّی جہی

تیری یاد دی کوئل میریاں سوچاں دی

کندھاں اُتّے بیہہ جاندی اے جھلی جہی

چھڈ دیندی ہے جد وہ کملی ہتھ میرا

راہواں دے وچ ڈیہہ جاندی اے جھلی جہی

انج تے دکھڑے مُکنے دا نئیں ناں لیندے

دکھاں دے نل کھیہ جاندی اے جھلّی جہی

مینوں تے اوہ اگّے لائی رکھدی اے

آپے پچھے رہ جاندی اے جھلّی جہی

اک واری جے زین اداسی آ جاوے

روح دے اندر بیہہ جاندی اے جھلّی جہی

زین شکیل

*************

سانوں کیہ دنیا دی لوڑ

سانوں سانول لکھ کروڑ

سانوں دکھڑے کرن سلام

سانوں سکھاں دی نئیں لوڑ

ساڈی چپ ڈھاڈی مجبور

ساڈی اکھیاں پاون شور

اسیں اڈئیے وانگ پتنگ

ساڈی سانول دے ہتھ ڈور

ساڈے دل دے اندر ککھ

ساڈی اکھیاں دے وچ روڑ

ساڈی چوری ہو گئی روح

ساڈے اندر پھردے چور

اسیں تپئیے وانگ تندور

ساڈے سینے پیندی سوڑ

ساڈی اکھیاں وی چھم چھم

سانوں کیہ جھانجھر دی لوڑ

اسیں زین دکھاں دے پِیر

سانوں سکھاں نال نہ جوڑ

زین شکیل

*************

پنجابی ماہیا

کوئی زلف دی چھاں ڈھولا

لبھی تیری اکھیاں وچ

اساں ڈُبن دی تھاں ڈھولا

زین شکیل

*************

پنجابی ماہیا

تند چُنی نوں میں پا بیٹھی

ایہہ دکھ عمراں دا

نی میں یار کھنجا بیٹھی

زین شکیل

*************

اکھیاں

رو رو ہنجو سارے مک گئے

ساتھ نہ چھوڑن اکھیاں

بال کے دیوا یاد تری دا

سفنے لوڑن اکھیاں

زین شکیل

*************

اکھیاں وچوں ڈلھیا کاجل

نین ملے تاں رُلیا کاجل

لعلاں ورگےنیناں دا وی

کوڈی دے مُل تُلیا کاجل

وانگ چناء دے ہوئیاں اکھیاں

پانی اندر گُھلیا کاجل

کدھرے وگن بھر بھر ہنجو

کدھرے راہواں بُھلیا کاجل

پیریں پے پے رووے کملی

عشقے دے دَر رُلیا کاجل

زین او اکھیاں بدل گئے نیں

لگدے ہلیا جُلیا کاجل

زین شکیل

*************

کوئی ایسی کھیڈ کھڈا ماہی

تینڈا نام جپے ہر ساہ ماہی

اَج سووَن دا مُل پے جاوے

اَج سُفنے دے وچ آ ماہی

ساڈے سینے وِچ پچال آون

ساڈا رک رک آوے ساہ ماہی

اسیں تینوں رج رج تکنا اے

سانوں تیرے ملن دا چا ماہی

عمراں دا تھکیواں لتھ جاوے

اِنج گُھٹ کے سینے لاماہی

ہُن چھڈ نہ جاویں ہتھ پھڑ کے

اسیں کیتا ترا وساہ ماہی

اسیں زین کراں گے عید اپنی

توں چن وچ نظر تے آ ماہی

زین شکیل

*************

ساریاں گلّاں رَدّ کر دیناں

قسمے میں وی حدّ کر دیناں

اوہنوں کیویں بھلاں جس نوں

یاد کرن دی حَدّ کر دیناں

جتھے تیرا ناں سُن لیناں

اپنی ہستی رَدّ کر دیناں

پرچھاویں نوں آسرا دے کے

اپنے آپ توں وَدّھ کر دیناں

لوکی پچھّے پے جاندے نیں

تیریاں گلّاں جَدّ کر دیناں

او وی پیار دی حَدّ کر دیندے

میںوی حَدّوں وَدّھ کر دیناں

زین شکیل

*************

تیری ہک ہک گل دا دکھ اے

مینوں اَج وی کل دا دکھ اے

مسئلے دا کیہ دکھ ہونا سی

مسئلے دے ہر حَل دا دکھ اے

لوکی کڈھ کڈھ اکھّاں پچھدے

دس تینوں کس گل دا دکھ اے

شام، سویر دی گل نئیں کردا

مینوں ہر اک پَل دا دکھ اے

میری اَج تے ہنس دینا ایں

تینوں کیڑھی کل دا دکھ اے

اوہدی اکّھ اِچ وال اے کیونکر

سانوں ایسے گل دا دکھ اے

زین شکیل

*************

سائیاں ویڑھے آیا کر

سائیاں کھیڈ کھڈایا کر

ایہہ دل تیری نگری ہے

سائیاں پھیرا پایا کر

سائیاں تیری بات عجب

سائیاں تیری ذات عجب

سائیاں تیرے لوکاں دی

ہک ہک دن تے رات عجب

سائیاں میری ہستی گم

سائیاں میں وچ مستی، گم

تیری ذات دی کھوج اندر

سائیاں ساری بستی گم

سائیاں رج ستائی ہاں

سائیاں پنڈ پرائی ہاں

اپنے آپ نوں لبھن لئی

سائیاں در تے آئی ہاں

سائیاں دید کرا مینوں

سائیاں رج رجا مینوں

ذات دا کاسہ خالی وے

سائیاں خیراں پا مینوں

دل دے وچ سمایا کر

سائیاں دور نہ جایا کر

ایہہ دل تیری نگری ہے

سائیاں پھیرا پایا کر

سائیاں ویڑھے آیا کر

زین شکیل

*************

دید تری دی خاطر ماہیا

رو واں پا پا پج وے اڑیا

مِٹّھا مِٹّھا بول اساں نال

َبدلاں وانگ نہ گج وے اڑیا

راتیں یاد تری دے ہنجو

اَکھ وچ جاندے سج وے اڑیا

تینوں تک تک کملی ہو گئی

پر ہوندا نئیں رج وے اڑیا

مکدی مکدی مک چلّی آں

دیر نہ لاویں اَج وے اڑیا

میں مظلوم، نمانی، کوجھی

توں انصاف تے جج وے اڑیا

زین میں اُس دی کالی کملی

اوہ اے زھد تے حج وے اڑیا

زین شکیل

*************

ساڈے دل دا شہر اَباد

سانوں آوے ڈھولن یاد

ساڈی پِجّھی پِجھّی اَکھ

اسیں ہو نہ سکیے وَکھ

اسیں دکھاں دے سلطان

ساڈے دل اندر طوفان

ساڈی کوئی نہ لیندا سار

ساڈے ہوٹھاں تے فریاد

سانوں آوے ڈھولن یاد

سانوں آوے پریتم یاد

ساڈے آسے پاسے غم

ساڈا جاوے رک رک دم

اسیں پھلاں ورگے لوک

سانوں عمروں لمّے روگ

سانوں کیتا ہجر نے قید

سانوں کون کرے آزاد

سانوں آوے ڈھولن یاد

سانوں آوے پریتم یاد

ساڈے ہنجو وچ قطار

اسیں روندے زار و زار

اسیں پل دا منگیا سکھ

سانوں لبھے دکھ ہزار

ساڈی اجڑی ہر تعبیر

ساڈے سفنے وی برباد

سانوں آوے ڈھولن یاد

سانوں آوے پریتم یاد

زین شکیل

*************

پے چلیو ای شام نی مائے

نہ آوے آرام نی مائے

اِک دو دن دی گل نہ مائے

ایتھے درد دوام نی مائے

اتھرو ڈولھاں، دَس کیہ بولاں

دکھڑے کرن کلام نی مائے

سینے بلدی اَگّ بجھاواں

لے لے تیرا نام نی مائے

ساڈے اندر گھور ہنیرا

ساڈے سِر تے شام نی مائے

رگ رگ اندر دُکھ رچیا اے

دے سکّھاں دا جام نی مائے

لوکی سانوں کھو کھو کھاون

لا لا کے الزام نی مائے

اوکھے اوکھے ساہ پئے نکلن

کیتا درد قیام نی مائے

کیہ ایہہ ساڈے لیکھ نی امّاں

کیہ ساڈا انجام نی مائے

چُنّی وچ لکا لے سانوں

مُک جاون آلام نی مائے

زین شکیل

*************

نی ماں!

ساڈا غماں دا بھریا دل

کوئل دے گَل کھبھ گئے کنڈھے

گئے سارے سُر چھِل

سانوں ویلا تک تک نسّے

کِنّوں کَوِیے مِل

دَھر چھڈّی اے کِنّے ساڈے

سینے اُتّے سِل

جتھے اتھرو ڈِگن اوتھے

دُکھ جاندا اےکھِل

مار مکا دے بھاویں سانوں

زخماں نوں نہ چھِل

نی ماں!

ساڈا غماں دا بھریا دل

زین شکیل

*************

گلاں باتاں کر بیٹھا واں ویلے سِر

بیڑی وانگوں تر بیٹھا واں ویلے سِر

ویلا لنگھیا تے فِر اکھّاں کھلیاں نیں

میں خورے کی کر بیٹھا واں ویلے سِر

مویا ہاں تے دکھاں کھیڑا چھڈیا اے

چنگا ہویا مر بیٹھا واں ویلے سِر

اوہنے مینوں بے اِتبارا کہنا سی

اَکھّ اِچ ہنجو بھر بیٹھا واں ویلے سِر

خواباں دی اک گٹھڑی اکھیاں چائی سی

خورے کتھے دَھر بیٹھا واں ویلے سِر

ماڑی چنگی تے کی رونا کی ہسنا

جو کرنا سی کر بیٹھا واں ویلے سِر

زین شکیل

*************

رو رو کے ہن پیڑاں ہَسَن لگ پئیاں

کتھے ایہہ تقدیراں نَسَن لگ پئیاں

رانجھن وی تے ونجلی چلھے پا بیٹھے

خورے کتھے ہیراں وَسَن لگ پئیاں

نکی نکی گل وی وڈی ہو جاندی

سانوں ایہہ تقصیراں دَسَن لگ پئیاں

پیڑاں دے نل جُسّا بھریا ہویا اے

سکھاں نوں زنجیراں کَسَن لگ پئیاں

خواباں دے ہُن رو رو ہنجو مُکّے ہِن

اکھیاں چوں تعبیراں وَسَن لگ پئیاں

سارے دکھڑے سینے دے نل لائے سَن

ساڈے اُتّے پیڑاں ہَسَن لگ پئیاں

زین شکیل

*************

جد وی تینوں حال سناناں رو دیناں

اپنی کوئی گل چھپاناں رو دیناں

نیندر نوں میں واج تے ماری جاناں واں

اکھیں اندر خواب سجاناں رودیناں

زین شکیل

*************

پاویں روواں پاویں ہسّاں تاں کی اے

اپنے کولوں جنّا نسّاں تاں کی اے

اوہنے کیڑھا مینوں چیتے رکھنا اے

پیڑاں دسّاں یا نہ دسّاں تاں کی اے

زین شکیل

*************

ول آیا نہ رٹھڑے یار مناون دا

مُل نئیں پیندا ایویں رولا پاون دا

چنگے بھیڑے لوکی تے ہر تھاں ہندے

ساڈے اندر جذبہ درد ونڈاون دا

جاچ وی بھُل گئی چپ دے جندرے کھولن دی

سائیاں کیسی پریت ہمارے ڈھولن دی

زین شکیل

*************