اشعار/ قطعات

*****************

زین شکیل کے اشعار

*****************

یہ تو نسبت ہے آپ(ص) کی ورنہ

یہ زمانہ کچل گیا ہوتا

۔۔۔۔۔۔۔۔۔۔

بڑے بڑے کچھ لوگ بھی اکثر

چھوٹی باتیں کر جاتے ہیں

۔۔۔۔۔۔۔۔۔۔

وہ تو وقت پہ آجاتی ہے

میں ہی دیر لگا دیتا ہوں

۔۔۔۔۔۔۔۔۔۔

میں نے کیا شہر میں قدم رکھا

دیکھنے مجھ کو آ گئی بارش

۔۔۔۔۔۔۔۔۔۔

محبت کی لکیریں بھی

اُلجھ بیٹھیں مقدر سے

مجھے اب درد کا موسم

ٹھہرتا صاف دِکھتا ہے

۔۔۔۔۔۔۔۔۔۔

آنکھ میں پھیلتا گیا منظر

آنسوؤں کی قطار سے پہلے

۔۔۔۔۔۔۔۔۔۔

آ گیا تنگ تیری یادوں سے

تھک گیا تھا اداس ہو ہو کر

۔۔۔۔۔۔۔۔۔۔

اب بھی وہ انتظار کرتی ہے

یہ مرا وہم کیوں نہیں جاتا

۔۔۔۔۔۔۔۔۔۔

لگ گئی ضبط کی سبیل کوئی

آ ملا درد کا کفیل کوئی

میرے پیچھے ہی پڑ گیا یہ دل

مانتا ہی نہیں دلیل کوئی

۔۔۔۔۔۔۔۔۔۔

اب تجھے صبح تک ستائے گی

رات کے کان بھر دیے میں نے

۔۔۔۔۔۔۔۔۔۔

مری نیندوں کو رخصت کرنے والا

مرے خوابوں میں آنا چاہتا ہے

۔۔۔۔۔۔۔۔۔۔

مرے خوابوں سے اب جاتا نہیں ہے

تری بانہوں میں مر جانے کا موسم

۔۔۔۔۔۔۔۔۔۔

ایک تصویر دل میں آ ٹھہری

میری آنکھوں سے گر گیا پانی

۔۔۔۔۔۔۔۔۔۔

ایک لمحے کوسہی آ کے ذرا مل جاؤ

مختصر ہجر کی تفصیل بتانی ہے تمہیں

۔۔۔۔۔۔۔۔۔۔

کھن کھنا کھن سی ہے خیالوں میں

اُس نے کنگن پہن لیے ہوں گے

۔۔۔۔۔۔۔۔۔۔

نہ چھپانے کے لئے نہ ہی بچانے کے لئے

خاک ہوتی ہے محبت میں اُڑانے کے لئے

۔۔۔۔۔۔۔۔۔۔۔۔

یہ سانسیں اب فقط تعزیتی ہیں

تمہارے بعد میں زندہ نہیں ہوں

۔۔۔۔۔۔۔۔۔۔۔۔۔

نیند اگر مہرباں ہوئی ہوتی

ہم تجھے خواب میں گلے ملتے

۔۔۔۔۔۔۔۔۔۔۔۔۔

میں نے شب بھر بجھا کے دیپ سبھی

ایک جگنو سے رابطہ رکھا

۔۔۔۔۔۔۔۔۔۔۔۔۔

اور میں نے پکڑ لیا کاسہ

اور پھر اس نے بانٹ دی دنیا

۔۔۔۔۔۔۔۔۔۔۔۔۔

جب سے چھوڑا ہے آپ نے سننا 

میری باتوں پہ لوگ ہنستے ہیں

۔۔۔۔۔۔۔۔۔۔

وہ جو مجھ سے ملا نہیں کرتا

مجھ سے ملنے کو روز آتا ہے

۔۔۔۔۔۔۔۔۔۔

ہم نے بھی تو رو رو اپنی آنکھیں دشت بنا ڈالی ہیں

تم نے بھی تو ہم سے آ کر ملنا جلنا چھوڑ دیا ہے

۔۔۔۔۔۔۔۔۔۔

میری دنیا اجال دی جس نے

تھی وہ رنگت کی سانولی لڑکی

۔۔۔۔۔۔۔۔۔۔

میں اپنے آپ کو اکثر ہی آئینہ لے کر

ہر ایک بات پہ "تم" کہہ کے ہی بلاتا ہوں

۔۔۔۔۔۔۔۔۔۔

جو مری جان بنا رہتا تھا

اب وہ انجان بنا رہتا ہے

۔۔۔۔۔۔۔۔۔۔

ہم تو بکھرے پڑے تھے راہوں میں

آپ ہی ڈھونڈنے نہیں نکلے

۔۔۔۔۔۔۔۔۔۔

ستم تم بھی ختم کرتے نہیں ہو

تماشہ ہم شروع کرتے نہیں ہیں

۔۔۔۔۔۔۔۔۔۔

یہ جو فرصت اسے نہیں ملتی

یہ مری جان لے کے چھوڑے گی

۔۔۔۔۔۔۔۔۔۔

تم جو ہر بات بھول جاتے تھے

بس یہی بات یاد آتی ہے

۔۔۔۔۔۔۔۔۔۔

یونہی رنگت نہیں اڑی میری

ہجر کے سب عذاب چکھے ہیں

۔۔۔۔۔۔۔۔۔۔

اب ترے بعد میں نے سوچا ہے

تیرا غم تجھ سے خوبصورت ہے

۔۔۔۔۔۔۔۔۔۔

ہمیں وہ دیکھ کر گھبرا رہا ہے

اسے ہم دیکھ کر پچھتا رہے ہیں

۔۔۔۔۔۔۔۔۔۔

یہ عجب المیہ ہے، شہروں میں

لوگ معصوم ہی نہیں ہوتے

۔۔۔۔۔۔۔۔۔۔

میں جہاں کہیں گیا ہوں وہیں آ گئی اداسی

مجھے نوچ نوچ پھینکا مجھے کھا گئی اداسی

کئی بار مل گئی ہے مجھے رخ بدل کے لیکن

کوئی بات تھی کسی کی جو چھپا گئی اداسی

۔۔۔۔۔۔۔۔۔۔

وہ جو لڑکی ہے ایک کام میں گم

کوئی رہتا ہے اس کے نام میں گم

۔۔۔۔۔۔۔۔۔۔

اس کو لکھ دیا ہم نے

سات الگ زبانوں میں

ہاں ہمیں محبت ہے

۔۔۔۔۔۔۔۔۔۔

چار سو ہے فقط ترا چہرہ

میں نگاہیں ہٹا نہیں سکتا

۔۔۔۔۔۔۔۔۔۔

تو بھی دے دے کے صدا مجھ کو، چھپا رہتا ہے

تیرے دھوکے میں کئی بار ملا ہوں خود سے

۔۔۔۔۔۔۔۔۔۔

میں نے اک خواب کی تعبیر میں یہ دیکھا تھا

اک پری ہے جو کسی آسماں سے اتری ہے

۔۔۔۔۔۔۔۔۔۔

قطعہ

ایک دریا تمہاری یادوں کا

ایک کوزے میں جو سما نہ سکا

وہ کہانی تو یاد ہی نہ رہی!

میں تو کردار ہی بھلا نہ سکا

۔۔۔۔۔۔۔۔۔۔

ہم یونہی خوار ہوئے ہاتھ میں لے کر دل کو

شہر کے لوگ تو پتھر کے بدن والے تھے

۔۔۔۔۔۔۔۔۔۔

میں نے تجھ کو پلٹ کے دیکھا تھا

اور پھر ہو گیا تھا پتھر کا

۔۔۔۔۔۔۔۔۔۔

مجھ کو مٹی نے ہی سنبھالا ہے

تیری آنکھوں سے گر گیا تھا میں

۔۔۔۔۔۔۔۔۔۔

مجھے سچ مچ یقیں آتا نہیں ہے

گماں کے راستے ایسے بھی ہوں گے

۔۔۔۔۔۔۔۔۔۔

یہ مری زبان کو کیل کر کہاں لے گئے

مرے چارہ گر مجھے گفتگو پہ عبور تھا

۔۔۔۔۔۔۔۔۔۔

مجھے وسعتوں سے نکال کر کہیں دفن کر

یہ جو تیری حد کا خمار ہے مجھے راس ہے

۔۔۔۔۔۔۔۔۔۔

بات ہوتی ہی نہیں بات سے تیری ہٹ کر

ہم نے دیکھا ہے کئی بار بدل کر موضوع

۔۔۔۔۔۔۔۔۔۔

اب میں بند آنکھوں سے

کیا تمہیں بھی نہ دیکھوں؟

۔۔۔۔۔۔۔۔۔۔

ایک میں اور اک مرا سایہ

دو ہی کردار تھے کہانی میں

۔۔۔۔۔۔۔۔۔۔

خواب میں نے سمیٹ رکھے ہیں

تم فقط نیند لے کے آ جانا

۔۔۔۔۔۔۔۔۔۔

تری آرزو نے مجھ پر بڑے قہقہے لگائے

مری بے بسی نے مجھ پر بڑی تالیاں بجائیں

۔۔۔۔۔۔۔۔۔۔

آپ پہلے ہی روک لیتے ناں

اب ہمیں کس لیے بلاتے ہیں

۔۔۔۔۔۔۔۔۔۔

تو جو اتنا پکارتی تھی مجھے

دیکھ مشہور ہو گیا ہوں میں 

۔۔۔۔۔۔۔۔۔۔

بس محبت ہی بچ گئی مجھ میں

باقی کنگال ہو گیا ہوں میں

۔۔۔۔۔۔۔۔۔۔

مکتبِ چشم بھی ضروری ہے

اب میں ہر بات کہہ نہیں سکتا

۔۔۔۔۔۔۔۔۔۔

تو بھی اُتنی ہی خوبصورت ہے

اب بھی اُتنا ہی سر پھِرا ہوں میں

۔۔۔۔۔۔۔۔۔۔

جس طرح میں کوئی مصیبت تھا

ایسے پیچھا چھڑا لیا اس نے

۔۔۔۔۔۔۔۔۔۔

اس نے کہا کہ زخم کیوں چہرے پہ جا بجا

میں نے کہا کہ درد نہیں ہو رہا مجھے

۔۔۔۔۔۔۔۔۔۔

کس طرح روٹیاں بنائے گی

جو فقط سیلفیاں بناتی ہے

 ۔۔۔۔۔۔۔۔۔۔

مجھے سکوت سے باہر نکالنے والے

تری زبان مرا نام کیوں نہیں لیتی

۔۔۔۔۔۔۔۔۔۔

کس قدر کرب سے گزرتا ہوں

تیری آواز جب نہیں آتی

۔۔۔۔۔۔۔۔۔۔

مری نیند بھی مری آنکھ سے ترا نام لے کے گزر گئی

وہ جو خواب تھا مری عمر کا مِرے خال و خد ہی بدل گیا

۔۔۔۔۔۔۔۔۔۔

اس طرح حسن کی خیرات لئے بیٹھا ہوں

جس طرح گاؤں کی سوغات لئے بیٹھا ہوں

کیسے ہر رات نئے خواب سجا لیتے ہو

میں تو اب تک بھی وہی رات لئے بیٹھا ہوں

۔۔۔۔۔۔۔۔۔۔

کوئی ہم زاد نہ محرم تھا وہاں جنگل میں

ہم تری بات پرندوں کو سنا آئے ہیں

۔۔۔۔۔۔۔۔۔۔

میں ولی اداسی کا اور بادشاہِ غم

روز درد آتے ہیں بس مری زیارت کو

۔۔۔۔۔۔۔۔۔۔

اک تجھے چاہے جانے والوں میں

میرا چہرہ بھی اتفاق سے تھا

۔۔۔۔۔۔۔۔۔۔

پوری باتیں کرنے والے آدھے آدھے لوگ

کتنی مشکل میں رہتے ہیں سیدھے سادے لوگ

۔۔۔۔۔۔۔۔۔۔

میرے چہرے سے اتفاق تو کر

میں ترے واسطے جیا اک عمر

تیری باتیں عیاں نہیں ہیں کیا؟

۔۔۔۔۔۔۔۔۔۔

وہ شخص زہر میں شیرینی گھولنے والا

کہاں گیا مِرے لہجے میں بولنے والا

۔۔۔۔۔۔۔۔۔۔

تم بھی پانی سے بھر گئے ان کو

کیا بگاڑا تھا میری آنکھوں نے

۔۔۔۔۔۔۔۔۔۔

میں تو ہر موڑ پر میسر تھا

تو نے کیسے گنوا دیا مجھ کو

۔۔۔۔۔۔۔۔۔۔

یہ اور بات، ہمیں راس آ نہیں پائے

ہمارے پاس بڑی دیر تک رہے ہو تم

۔۔۔۔۔۔۔۔۔۔

میں تو اندر سے تیرے جیسا ہوں

میری تصویر پر نہ جایا کر

۔۔۔۔۔۔۔۔۔۔

یہ تو آدھا بھی نہیں جس پہ تڑپ اٹھا ہے

تو نے دیکھا ہی نہیں ہجر مکمل اے دل

۔۔۔۔۔۔۔۔۔۔

آئینہ جل گیا تھا چہرے سے

وہ تماشہ عجب تماشہ تھا

۔۔۔۔۔۔۔۔۔۔

وہ میرے ساتھ بھی مرنے پہ کتنا راضی تھا

مرے بغیر بھی جینا تو آ گیا اس کو

۔۔۔۔۔۔۔۔۔۔

شہر کا شہر ہی کرتا ہے تمہاری باتیں

ہر کوئی شخص تمہارا ہی پتا پوچھتا ہے

۔۔۔۔۔۔۔۔۔۔

یہ رہائی مجھے نہیں منظور

اپنی آنکھوں سے مت نکال مجھے

۔۔۔۔۔۔۔۔۔۔

خواب کا واسطہ دیا میں نے

پھر کہیں نیند لوٹ کر آئی

۔۔۔۔۔۔۔۔۔۔

اے غمِ یار معذرت تجھ سے

دیر تک آنکھ رو نہیں پائی

۔۔۔۔۔۔۔۔۔۔

آج پھر درد ناک لہجے میں

ہم سے کرنے وہ گفتگو آیا

۔۔۔۔۔۔۔۔۔۔

وہ بھی ہر اک بات پہ مجھ کو کر کے خفا یہ کہتی ہے

کہ میں اس کو شکوہ کرتے کتنا اچھا لگتا ہوں

۔۔۔۔۔۔۔۔۔۔

آدھا تیرا آدھا میرا

ہم دونوں کا پورا چاند

۔۔۔۔۔۔۔۔۔۔

چاند پہ بادل تیر رہے ہیں

ایسے کیسے سو جاؤ گی

۔۔۔۔۔۔۔۔۔۔

وہ بھی باتوں میں چلی آتی ہے

میں بھی باتوں میں لگا لیتا ہوں

۔۔۔۔۔۔۔۔۔۔

اب تمہیں کس طرح سے سمجھاؤں

رونے دھونے سے کچھ نہیں ہوتا

۔۔۔۔۔۔۔۔۔۔

اک محلّے میں آٹھ گلیاں تھیں

دل مگر تیسری گلی میں تھا

۔۔۔۔۔۔۔۔۔۔

دیکھنا اس کی باس آئے گی

آؤ میرے قریب سے گزرو!

۔۔۔۔۔۔۔۔۔۔

اتنی چھوٹی سی عمر میں آ کر

عشق بوڑھا بنا گیا مجھ کو

۔۔۔۔۔۔۔۔۔۔

اب یہ احسان اتاروں تو اتاروں کیسے

میرے پَر کاٹ کے آزاد کیا ہے اُس نے

۔۔۔۔۔۔۔۔۔۔

دیکھو آواز دے رہا ہوں میں

میری تصویر میں چلے آؤ....!

۔۔۔۔۔۔۔۔۔۔

تم بتا دیتے زمانے بھر سے کیا کہتا پھروں؟

کیوں مِرا یوں بے وفا ہونا ضروری ہو گیا!

۔۔۔۔۔۔۔۔۔۔

جس میں ہر بات تھی بہت اچھی 

آج اچھا نہیں کیا اس نے 

۔۔۔۔۔۔۔۔۔۔

مت برا ماننا مگر سچ ہے

عشق زیادہ نہ تھا ضرورت سے

۔۔۔۔۔۔۔۔۔۔

میسج seen اچانک سب ہو جاتے ہیں

تم مصروف کہیں پر پھر بھی رہتے ہو

۔۔۔۔۔۔۔۔۔۔

وہ جس میں تم نے کبھی لوٹ کر نہیں آنا

بکھر رہا ہے وہی خواب میری آنکھوں میں

۔۔۔۔۔۔۔۔۔۔

میں کہاں تک ترے خوابوں کو سجائے رکھوں

تو بھی کب تک مری تصویر میں کھوئی رہے گی

۔۔۔۔۔۔۔۔۔۔

سخت اجڑے ہوئے مکان میں کیوں؟

حسرتیں لوٹ کر چلی آئیں

۔۔۔۔۔۔۔۔۔۔

ہجر کی آنکھ لگ گئی ہو گی

وصل کے بے مراد ہونے تک!

۔۔۔۔۔۔۔۔۔۔

مرے وجود کے اندر جو جھانک سکتا نہیں

میں اس کے سامنے اپنا لباس کیسے کروں؟

میں خود اداس نہیں ہو رہا بہت دنوں سے

تمہیں جو کرنا پڑے تو اداس کیسے کروں؟

۔۔۔۔۔۔۔۔۔۔

خود کو برباد کر کے دیکھنا ہے

پھر تمہیں یاد کر کے دیکھنا ہے

وسعتِ درد جانچنی ہے مجھے

ہجر آباد کر کے دیکھنا ہے

۔۔۔۔۔۔۔۔۔۔

خواب میں شام ڈھلی اور وہ چندا اترا

یعنی یہ آنکھ لگی تھی ہی کہ پھر تم آئے

میں بھی اس شوخ کو دیکھوں کبھی ژولیدہ مُو

کاش وہ شہر میں ہو کر کبھی گم سُم آئے

۔۔۔۔۔۔۔۔۔۔

تم بچھڑتے ہو کس سلیقے سے

چاہتے ہی نہیں جدا ہونا

۔۔۔۔۔۔۔۔۔۔

گر نہیں پھول پھر کھلا کیوں ہوں

میں اداسی کا سلسلہ کیوں ہوں

تم سے مل کر اداس ہو بیٹھا

سوچتا ہوں تمہیں ملا کیوں ہوں

۔۔۔۔۔۔۔۔۔۔

چھت پہ آؤ تو ایک لمحے کو

چاند کو آئینہ دکھانا ہے!!

۔۔۔۔۔۔۔۔۔۔

تم اگر زندگی بنے ہوتے

زندگی ڈھنگ سے بسر ہوتی

۔۔۔۔۔۔۔۔۔۔

اس نے آنکھوں سے بات کہہ ڈالی

لفظ قربان ہو گئے میرے

۔۔۔۔۔۔۔۔۔۔

مشکلوں سے جسے نکالا تھا

جانے وہ دل میں کیوں اتر آئی

آج اس کو نظر نے پھر ڈھونڈا

آج بھی وہ نظر نہیں آئی

۔۔۔۔۔۔۔۔۔۔

میرے جذبات اتنے مہنگے تھے

تو نے سستے میں بیچ ڈالے ہیں 

۔۔۔۔۔۔۔۔۔۔

جا کے اب تک نہ لوٹنے والے

جا تجھے عید کی مبارک ہو

۔۔۔۔۔۔۔۔۔۔

جب بھروسہ نہیں ہے اپنوں پر

غیر ہوتے ہیں غیر ہی، پاگل!

میری آنکھیں نہ اس طرح دیکھو

جان لیتا ہوں اَن کہی، پاگل!

۔۔۔۔۔۔۔۔۔۔

اِس لیے ہے اُسے گلہ مجھ سے

اُس کی ہر بات میں نے کیوں مانی!

۔۔۔۔۔۔۔۔۔۔

کاش تم چلے آؤ

اور میں تمہیں سانول

عید کی مبارک دوں!

۔۔۔۔۔۔۔۔۔۔

بس ذرا سا ہی رہ گیا ہوں میں

بس ذرا سا ستم مزید کرو!!!

۔۔۔۔۔۔۔۔۔۔

یہ کس لیے تری آواز جل گئی اپنی

ترا تو لہجہ مجھے بھسم کرنے والا تھا

۔۔۔۔۔۔۔۔۔۔

وہ اپنے ساتھ سب کچھ لے گیا ہے

یہاں اس کی ضرورت رہ گئی ہے

۔۔۔۔۔۔۔۔۔۔

ذرا جانے سے پہلے سوچ لیتے

یہاں ہر چیز آدھی رہ گئی ہے

۔۔۔۔۔۔۔۔۔۔

نام لکھا ترا کتاب میں بس

پھر اضافہ ہوا عذاب میں بس

۔۔۔۔۔۔۔۔۔۔

ابھی بھی وقت ہے تم لوٹ جاؤ

مجھے تم سے محبت ہو چلی ہے

۔۔۔۔۔۔۔۔۔۔

یہ مجھ سے آئینہ کرنے لگا ہے

حسیں چہرہ بگڑ جانے کی باتیں

۔۔۔۔۔۔۔۔۔۔

میں اس کے ہجر کی قینچی چلا کر

یہ دن اب زندگی کے کاٹتا ہوں

۔۔۔۔۔۔۔۔۔۔

ایک اداسی جو مجھ کو چھیڑتی ہے

اک سمندر مجھے پکارتا ہے

ربط کیسا بھی ہے عجب تو نہیں

کون اب خواہشوں کو مارتا ہے

جیسے مشکل کا وقت کاٹتے ہیں

وہ مجھے اس طرح گزارتا ہے

۔۔۔۔۔۔۔۔۔۔

اسے ہی اونگھ آنے لگ گئی تھی

وگرنہ اک کہانی اور سنتے

اگر کچھ ہوش بچ جاتا تو پھر ہم

صدائے "لن ترانی" اور سنتے

۔۔۔۔۔۔۔۔۔۔

رابطوں میں بھی حد تو ہوتی ہے

میرے پیچھے ہی پڑ گئی ہو تم

۔۔۔۔۔۔۔۔۔۔

یاد میں تیری اب بھی رویا کرتا ہوں

نیند کی گولی کھا کر سویا کرتا ہوں

۔۔۔۔۔۔۔۔۔۔

کچھ وہ بھی اب مزید مسیحا نہیں رہا

کچھ یوں ہوا کہ میں بھی اشارہ سمجھ گیا

۔۔۔۔۔۔۔۔۔۔

روش دونوں عجب اپنا چکے ہیں

یہ غم دل سے مگر جاتا نہیں ہے

اسے میں یاد بھی کرتا نہیں ہوں

مجھے وہ یاد بھی آتا نہیں ہے

۔۔۔۔۔۔۔۔۔۔

میں کسی خواب میں سوتے ہوئے ڈر جاتا ہوں

اتنی وحشت ہے کہ روتے ہوئے ڈر جاتا ہوں

۔۔۔۔۔۔۔۔۔۔

چاردن کے جھگڑے میں

مجھ کو کھو نہیں دینا

آنکھ روٹھ جائے گی

مجھ کو رو نہیں دینا

۔۔۔۔۔۔۔۔۔۔

جو مرے دل پہ گزرتی ہے دکھاؤں کیسے

اتنا بے چین سمندر نہیں ہوتا ہو گا

۔۔۔۔۔۔۔۔۔۔

میں نے بھی اس لیے رخصت کبھی چاہی ہی نہیں

اس کی خوشبو نے مجھے باندھ کے رکھا ہوا ہے

۔۔۔۔۔۔۔۔۔۔

اپنی مرضی سے بھی اب سانس نہیں لیتا میں

کوئی مٹھی میں مری جان لیے بیٹھا ہے

۔۔۔۔۔۔۔۔۔۔

مرے دل اب مچلنا چھوڑ دے ناں!

میں اُس سے ہر طرح سے مطمئن ہوں!

۔۔۔۔۔۔۔۔۔۔

مجھے تو ہر طرح سے چاہئیے تھا

تری تصویر تجھ جیسی نہیں ہے

۔۔۔۔۔۔۔۔۔۔

اب تم آئے ہو خواب لینے کو

جانے کس کو، کدھر، دئیے میں نے

نوچتی تھیں بدن تری یادیں

ان کے ناخن کتر دئیے میں نے

اب تجھے صبح تک ستائے گی

رات کے کان بھر دئیے میں نے

۔۔۔۔۔۔۔۔۔۔

آج تو بے رخی کی حد کر دی

حال پوچھا نہیں اداسی نے

۔۔۔۔۔۔۔۔۔۔

مری آنکھیں مسلسل جاگتی ہیں

مری قسمت سکوں سے سو رہی ہے

۔۔۔۔۔۔۔۔۔۔

اس یقیں سے بھی کسی روز مجھے رونا ہے

کہ وہ روتے میں ہنسانے تو چلا آئے گا

۔۔۔۔۔۔۔۔۔۔

ہجر اتنی سی رعایت تو مجھے دیتا ہے

ایک مسکان مرے لب پہ سجی رہتی ہے

۔۔۔۔۔۔۔۔۔۔

آج بس غور سے سنا میں نے

میرے لہجے میں بولتا ہوا تُو

۔۔۔۔۔۔۔۔۔۔

جو تو نہیں ہے تو پھر اس پہ حیف کیا کرنا

مرے نصیب میں تیری طرف سفر تو ہے

جو زخم زخم ہیں پاؤں تو اب ٹھہرنا کیا

تمہاری یاد سدا میری ہمسفر تو ہے

۔۔۔۔۔۔۔۔۔۔

جس بھی عالم میں ہوں، وحشت ہے کہ گھر ہے کیا ہے؟

کوئی رستہ بھی اِدھر کو نہیں آتا، جاتا

۔۔۔۔۔۔۔۔۔۔

کون اتنا نچوڑنے بادل

آ گیا ہے ہماری آنکھوں میں

۔۔۔۔۔۔۔۔۔۔

رج کے سَجّی چاول کھایا کرتا ہوں

یوں میں تیرا ہجر منایا کرتا ہوں

۔۔۔۔۔۔۔۔۔۔

جو تجھ کو مان لیا ہے تو پھر گلہ کیسا

اب اعتبار ترا مختصر نہیں کرنا

یہ تیرا ہجر تجھے میرے پاس لائے گا

سو انتظار ترا مختصر نہیں کرنا

۔۔۔۔۔۔۔۔۔۔

ابھی جہاں ہوں وہاں سے تو لوٹ آنے دو

ـــــــمیں ایک بار محبت کروں گا پھر تم سے

۔۔۔۔۔۔۔۔۔۔

رنج و غم کے صحرا میں

ساتھ چلنے والے جو

چار لوگ ہوتے ہیں

"یار لوگ ہوتے ہیں"

۔۔۔۔۔۔۔۔۔۔

ابھی نہ چھیڑ، ذرا ٹھہر اے غمِ دنیا

ابھی ملنگ بڑے مست ہیں محبت میں

۔۔۔۔۔۔۔۔۔۔

ہر سو لے کر پھرتا ہے وہ چاک محبت کا

جس کو بھی ہو جاتا ہے ادراک محبت کا

خوشبو میرے چاروں جانب گھوم رہی ہے جو

آیا ہے پھر خواب مجھے اک پاک محبت کا

۔۔۔۔۔۔۔۔۔۔

میں تو ہنستے ہوئے اکثر یونہی رو پڑتا ہوں

پوچھ لینا تھا اداسی سے مرے بارے میں

۔۔۔۔۔۔۔۔۔۔

ڈھونڈتےہی رہ گئے ہم وصل میں آسودگی

اور کچھ بھی مل نہیں پایا بچھڑنے کے سوا

۔۔۔۔۔۔۔۔۔۔

خدا کرے کہ تجھے میں بھی منتظر نہ ملوں

تُو میرے پاس جو اِس بار ٹوٹ کر آئے

۔۔۔۔۔۔۔۔۔۔

اُسے اب اپنے ہی ہاتھوں گنوا کے سوچتے ہیں

ہمارا اُس کے علاوہ تو کوئی تھا ہی نہیں

۔۔۔۔۔۔۔۔۔۔

صرف اپنے مفاد کی خاطر

لوگ کتنے فریب دیتے ہیں

۔۔۔۔۔۔۔۔۔۔

عرصہ بیت گیا ہے بچھڑے اب تو ایسا عالم ہے

آنکھیں دیکھنے والی آنکھیں خط پڑھ پڑھ کے روتی ہیں

۔۔۔۔۔۔۔۔۔۔

کب تمہاری مثال چاہتا ہوں

بس تمہارا خیال چاہتا ہوں

۔۔۔۔۔۔۔۔۔۔

ہم تری یاد منانے کے لیے
ہر طرف عالمِ ھُو ڈھونڈتے ہیں

ہم بھرے شہر میں دیوانہ وار
ہر کسی شخص میں "تُو" ڈھونڈتے ہیں
۔۔۔۔۔۔۔۔۔۔
خدا کرے کہ تری ذات باعثِ سُکھ ہو
خدا کرے کہ محبت بھری رہے تجھ میں
۔۔۔۔۔۔۔۔۔۔
لو تمہیں خود پہ اختیار دیا
جاؤ کیا یاد کرو گے تم بھی
۔۔۔۔۔۔۔۔۔۔
تم مجھے سخت زہر لگتے ہو
پھر بھی جی چاہتا ہے پینے کو
۔۔۔۔۔۔۔۔۔۔
زہر لگتے ہو پھر بھی جانے کیوں
دل یہ کرتا ہے تم کو پی جائیں 
۔۔۔۔۔۔۔۔۔۔
میں اکیلا تو کسی طور نہیں ہو سکتا
تُو نہ ہوتا تو مِرے گھر میں اُداسی ہوتی
۔۔۔۔۔۔۔۔۔۔

اب ستاتی ہے شب و روز تو روتے کیوں ہو؟

کس نے بولا تھا اُداسی سے مِری بات کرو!

۔۔۔۔۔۔۔۔۔۔

ایک دن ہو تو سمجھ بھی آئے
دکھ تو اب روز ہمیں ڈھونڈتے ہیں
ہر کسی غم کے ستائے ہوئے ہم
جب بھی روتے ہیں تمہیں ڈھونڈتے ہیں
۔۔۔۔۔۔۔۔۔۔
کاش عرشوں سے بھی پیغام رسانی ہوتی

اپنے پیاروں کی کوئی خیر خبر تو آتی
۔۔۔۔۔۔۔۔۔۔

وہ جو اک شخص مری جان بنا رہتا ہے

جانتے بوجھتے انجان بنا رہتا ہے

۔۔۔۔۔۔۔۔۔۔

زین شکیل